Wawancan Perjuangan

Patung Radin Inten Sang Pahlawan Nasional

WAWANCAN PERJUANGAN 1949


Riwayat Tanoh Lampung, perang lawan Belanda
Kuruk jak Telukbetung, di tahun ampat siwa
Masa sina tihitung, bulan Januari nama

Khani Sabtu sai ulung, tanggal satu sai nyata
Tanggal sina tipegung, tisirokkon di dada
Selingkung Tanoh Lampung, gegoh haga binasa

Penduduk jadi bingung, semapu di kehaga
Ya siap terus lijung, segok mit delom rimba
Apal bantal tiusung, bias mak dapok lupa

Gimbak seluruh Lampung, rakyat ngembila nyawa
Tandak jak Telukbetung, lapah pugapa-gapa
Pegawai kuruk kampung, lijung nutuk tentera

Di Panjang tum-ta-le-tum, timbakanni Belanda
Lamban lamon sai tutung, tisuwah tibinasa
Pelitik delom hitung, nyin dang disi Belanda

Rakyat pindah mit kampung, ngembatok sai kuasa
Kancah rayoh tiusung, alat hurik di rimba
Korban lamon tihitung, sai mati rik binasa

Ditawan rik digantung, dipukul rik digada
Pemuda sai dikurung, terus kuruk penjara
Kidang ya mawat urung, rakyat ngelawan juga

Sinalah gara-gara, Belanda mungkir janji
Kesalahanni nyata, melanggar Linggarjati
Naskah Renville binasa, batal sama sekali

Harta lamon binasa, rakyat lamon sai mati
Segok mit delom rimba, diunut debi pagi
Dihalu ram digada, ditali pakai huwi

Laskar Putra Putri Bumi Pertiwi

Matti luwak Belanda, mak ngedok kasihanni
Mak dapok tungga jelma, culukni mak buhinti
Rasan keliwat sara, susah jarang bandingni

Lapah pucarda-carda, risok nihan kurang mi
Jak huma mit di huma, lapah ngunut rejeki
Ki tungga jelma suka, mengan ram radu kari

Kipak mak suwa iwa, ki muka suka hati
Unyin ram menderita, kenyin guai pengaji
Kekira bulan lima, mupakat delegasi

Rum-Royen tian ruwa, sina awal mulani
Persetujuan sai nyata, perang haga buhinti
Perletakan senjata, pangkal aman negeri

Ya mak beni jak sina, mupakat tipubiti
Sidang ngeliling mija, K.M.B. gelarni
Di negeri Belanda, kumpul do delegasi

Gedung Juang Lampung

Bung Hatta ram bicara, nyepok sai betik hani
Ram amankon dunia, nyin dang selisih lagi
Putusan awal mula, Republik ram kembali

Kembali mit di Jogja, sina ibu negeri
Tanggalni ram mak lupa, jatuh di enom Juni
Perletakan senjata, syarat penting sekali

Menurutkon sai nyata, perang yaddo buhinti
Pemerintah di Jogja, mulai bekerja lagi
Sipil jama tentera, rituk dawah debingi

Ngator segala kerja, pegawaini dicari
Kabinet sidang juga, KNIP-ni mak buhinti
Mulai jak bulan siwa, perang radu mak lagi

Kham tinggal nunggu masa, tahap penyelesaianni
Seluruh Indonesia, enom belas negeri
RIS bentuk negara, ikatan saunyinni

Kabinet R.I.S

Sina mak jadi ngeba, asal satu maksudni
Ram satu cita-cita, merdika rik abadi
Kedaulatan sai nyata, mak ngedok syarat lagi

Lepas ram jak Belanda, ngator diri sendiri
Seluruh Indonesia, tinggal megung kemudi
Haga lapah mit dipa, ram jadi jeraganni

Tinggal ram berusaha, dang buhinti buhinti
Kenyin negara jaya, makmur sepanjang hari
Sai nanti ngerasa ya, ram saunyin-unyinni

Sampai munih berita, di tanggal dua tujuh
Desember radu nyata, ticatat sungguh-sungguh
Penyerahan Belanda, kedaulatan sai penuh

Tanggal rik rani sina, cakakni Handak-Suluh
Merah-Putih bendira, bekibar yaddo kukuh
Mulai jak waktu sina, merdika ram kak penuh

Jak tahun ampat siwa, hati ram dang ki ginjuh
Belanda mak kuasa, jak tahun lima puluh
Sampailah cita-cita, dengan tekad sai teguh

Cawani bapak kita, dang kuti hati rusuh
Bersatu rik sekata, musyawarat di tiuh
Sina pangkal bahagia, lamun tipegung kukuh

Ya mak mudah sekali, menuju cita-cita
Mak tantu bingi rani, bulan tahun rik masa
Sina mula kubiti, nyin ram buinda-inda

Pi’il bangsa ram hinji, haga ki senang ganta
Mula susah sekali, ngendidik bangsa kita
Titawai mak ngereti, insafni jaoh nana

RIS radu berdiri, hasil ram jama-jama
Dang kuti tinggi hati, kak nepuk-tepuk dada
Banguk ram ati-ati, mudah tunai ki cawa

Peta R.I.S

Seia rik sehati, seasas cita-cita
Sina mula kubiti, sebab wat munih jelma
Cawa mak ati-ati, mak ngedok tata basa

Negara ram ji hani, hasil sikam berjuang
Lain hak ulih kuti, pertaymu mawat menang
Injuk delom hanipi, ya cawa sambil lalang

Pikir kuti puwari, sebab sapa ram menang
Hasil jak delegasi, ulih K.M.B. sidang
Sedongkon tiyan sudi, mak cawa sikam menang


Sebab urusan negeri, lain hak ulih lalang
Nyak harap jama kuti, ati-ati bubilang
Dang ngembalakkon diri, ulih ram lagi senang

Ana do RIS berdiri, dang kuti anggop gampang
Kemakmuran negeri, sina hasil berjuang
Pira jumlah korbanni, mawat sai dacok bilang

Pasal soal korupsi, sina negara halang
Dang kuti lunik hati, cawa jo nyata terang
Bekerja jaman sinji, lain mudah rik gampang

Dang kurang ati-ati, delom RIS ram berjuang
Nontong di kanan kiri, jaohkon sai dilarang
Pi’il sai ngeba rugi, payu ganta ram buang

Jaohkonlah korupsi, mencatut di jawatan
Pemimpin ram mak ngeni, kantu bang ram tulahan
Kantu ram kuruk buwi, barang jadi rampasan

Salamku jama kuti, betik-betik berjuang
Nawaitu delom hati, sina jadi pedoman
Hurik ram ji mak beni, ram musti pindah jengan

Pegawai musti tabah, ngerjakon administrasi
Disan sungi sai mudah, ngelakukon korupsi
Sanajin ya disumpah, kidang pagun mak bukti

Lah lawi matti payah, ki mak insaf di diri
Mawat rabai di tulah, asal nyak mansa hani
Mula nyak buginalah, kapan ram haga jadi

Semuga Insya Allah, sampai maksudni diri
Berjuang dang gelisah, tetop iman di hati
Kantu kerja ram salah, negara jadi rugi

Tantu pemimpin marah, taru goh niku hani
Jelma ji lagi nayah, mak guna niku lagi
Perbuatanmu na salah, ngerugikon negeri

Ana ya kupabalah, kenyin ram ati-ati
Delom RIS berjuanglah, dengan giat sekali
Nyin bangsa ram senanglah, di kemudian hari

Kisah haga kubalin, lain munih berita
Ki mansa kabar angin, pikir pai benor sina
Titilik penyin-penyin, nyin dang salah galipa

Negara berdisipelin, ngehormati sai tuha
Sai sanak ram tipimpin, sosial radu nyata
Negara radu balin, dijajah ram mak haga

Nasihatni pemimpin, ngaji pai Panca Sila
Tipaham rajin-rajin, Undang Dasar Negara
Tipelajari unyin, tujuanni merdika

Tikaji unyin-unyin, pekabaran berita
Cuba pikir perwatin, selama ram merdika
Makkung belajar unyin, sina mula binasa

Ulih ya kurang penyin, cutik-cutik merdika
Tipasalah pemimpin, tihina rik tiwada
Padahal Pak Pemimpin, lamon sai menderita

Kidang mak rena unyin, wat bilangni sai ruwa
Nyepok pemimpin tulin, susah jarang titungga
Lamon ngaku pemimpin, kidang sekadar cawa

Ana ya kupakicik, sejar guai kakira
Pahikni pil tikanik, nyin dang badan binasa
Guai pedoman hurik, ngisi jaman merdika

Konferensi Meja Bundar di Den Hag

Masani ampai cutik, lima tahun sai nyata
Ki sanak lagi lunik, ki cawa lagi uba
Tanoman lagi renik, ampai ngembulung ruwa

Kapan haga tikanik, ki ram mak berusaha
Ram jaga betik-betik, kenyin negara jaya
Merdika terang bangik, liak pai lain bangsa

Ganta nyak balin kisah, di tentang persatuan
Dang kuti pecah belah, jejama ram buiman
Pikirkon kuti kidah, di saat perjuangan

Dinana ram na susah, bangkang unyinni lamban
Mak ngedok tanda ragah, unyinni kerabaian
Ya timbul alam wuwah, ram tapok selagaan

Mulani kupabalah, ngeliak kenyataan
Semarga pecah belah, mak niongkon alasan
Unyinni ngaku gagah, seucak di turunan

Ram unyin lagi salah, di tentangni hejongan
Kuharap pai berubah, ram radu balin jaman
Wa’tashimu bi hablillah, tigunakon pai Qur’an

Dang kuti pecah belah, kantu bang ram tulahan
Ngayun ram bersatulah, kenyin wat kekuatan
Pemimpin rik pasirah, rakyat ram kilu aman

Penglima Besar Jenderal Sudirman Sang Pemimpin Legendaris Putra Muhammadiyah

Ki nyadang gila mudah, payah ram ki ngedandan
Agama tipabalah, dang mak ingok di Tuhan
Halal haram tipisah, dang nutuk daya sitan

Dunia radu gunjah, gudani mak ketahan
Ki iman ram mak tabah, kuruk dayani sitan
Antak ija pai kisah, wawancan perjuangan

Riwayat ram tamatlah, puput di antak hinji
Segala kupabalah, jak awal mit akhirni
Benorkon ki ya salah, adik bapak puwari.***

sumber: Drs. H. Irfan Anshori